ថ្មីៗនេះ សារព័ត៌មាន The Mirror បានគាស់កកាយករណីដ៏គួរឱ្យអាណិតមួយដើម្បីជាសារដាស់តឿន ដោយនោះគឺជាករណីរបស់ម្តាយ និង កូនប្រុសជនជាតិប្រេស៊ីល ដែលបានស្លាប់ទាំងពីរនាក់ម្តាយកូននៅក្នុងផ្ទះ ព្រោះឆក់ចរន្តអគ្គិសនីឆ្លងចេញពីម៉ាស៊ីនបោកខោអាវ។
តាមព័ត៌មានបានឱ្យដឹងថា ស្រ្តីខាងលើមានវ័យ ៣០ ឆ្នាំ មានឈ្មោះថា Diana ចំណែកឯកូនប្រុសរបស់នាងមានវ័យ ៦ ឆ្នាំ ឈ្មោះថា Pietro ដោយពួកគេទាំងពីរត្រូវបានប្រទះឃើញស្លាប់នៅក្នុងផ្ទះរបស់ខ្លួន នៅ Formosa ទីក្រុង Timón រដ្ឋ Maranhao ដែលហេតុការណ៍នេះបានកើតឡើងតាំងពីថ្ងៃទី ២០ ខែមេសា ឆ្នាំ ២០២៤ កន្លងទៅ។
តាមព័ត៌មានបានបង្ហាញថា ពីរនាក់ម្តាយ និង កូននេះ បានស្លាប់ដោយសារតែការឆក់ចរន្តអគ្គិសនី បន្ទាប់ពីការស្រាវជ្រាវរួច។ ក្នុងនោះ ខ្សែភ្លើងដែលចេញពីម៉ាស៊ីនបោកខោអាវបានប៉ះទៅជាមួយនឹងរនាំងដែកនៅក្នុងផ្ទះ បង្កឱ្យមានការឆ្លងចរន្ត ហើយកូនប្រុសបានទៅប៉ះរនាំងនោះ ធ្វើឱ្យគេបានឆក់នៅនឹងកន្លែង រីឯម្តាយឃើញក៏បានចូលទៅជួយ ប៉ុន្តែជាអកុសលក៏មិនរួចជីវិតទាំងពីរនាក់។
ដោយឡែក សាកសពរបស់អ្នកទាំងពីរ ត្រូវបានគេបញ្ជូនទៅធ្វើកុសល្យវិច្ច័យបន្ថែមទៀត មុននឹងចាត់ចែងទៅតាមប្រពៃណី ហើយខាងអាជ្ញាធរក៏បានដាស់តឿនទៅកាន់ប្រជាជនរបស់ខ្លួនថែមទៀត ទាក់ទងនឹងវិធីការជួយសង្រ្គោះមនុស្សកំពុងឆក់ចរន្តអគ្គិសនីផងដែរ ដើម្បីចៀសវាងការបាត់បង់ជីវិតទាំងពីរនាក់ដូចជាករណីនេះ៕
